مُلّه فليح جان يعيش بقرية .. صار عد اهل القرية مثل النبي ونازل عليهم..الماتحبل تروح المُلّه فليّح يسويلها حرز.. المريضه هايشته، ياخذها المُلّه فليّح يقرأ عليها دُعاء .. الرجلها طاردها، تروح المُلّه فليح علمود يرجعهه رجلهه
فد يوم اجه موظف من الحكومة، وگال للشيخ الحكومة راح تبني( چم صريفة ) وتسويهه مدرسة وفد يومين تلاثه يجي معلم يسجل اسماء الطلاب...
هاي طرگاعة وطّاحت على راس المُلّه ( راحت المالية )
صفن الها مُللّه فليّح ...و كعد ثلث تيام يحرك الناس على المعلم، ويفهم الناس اللي من اهل الله وعلى لاهيتهه انو هذا المعلم كلشي ما يفتهم..
ايام .. واجه المعلم...
كعدو ابيت الشيخ... سولف المعلم للشيخ وللناس شلون التعليم مهم ويطلعهم من الظلام للنور..
قاطعه مُللّه فليًح....وهسه انته هيج تفتهم وتعلم الوادم ؟
جاوبه المعلم.. العفو ما افتهمت شنو تقصد ؟
اكلك انته كتابه ما تعرف تكتب، تريد انوب تعلم الوادم، صدك چذب عمي......
جاوبه المعلم: اخي اني خريج اعداد المعلمين ابغداد ودارس وتعبان على نفسي شنو هذا الحجي !!
مُللّه فليّح وجّه كلامه للشيخ: شيخنا گدّام هاي الناس الطيبة، هاي ورقه وقلم اطيها للمعلم، وهاي ورقة وقلم يمي. خلّي ثنيناتنا نكتب كلمة ( حية ) وشوف ياهو الصحيح...
ضحك المعلم وتوقعها شغله سهله، وجرّ الورقة وكتب كلمة ( حيه ) وانطاها للشيخ.
مُللّه فليّح كتب بورقته كلمة ( حيه ) واطاها للشيخ، وصاح على الناس.
عمي تعالو شوفو ياهو الصحيح.
التمت الناس على فطاريتها وباوعو على ورقة المعلم، ما افتهموها.. باوعو على ورقة المُللّه لكوها مرسوم بيها حيه ملتفه..
صاحو.. عمي صدك چذب.. هسه انته جاينا مدري منين ما وين، وتريدنا نصدگك ونچذب عيونا !!
هاي الحيه شوفها.. چا مو الشخابيط مالتك...
طاحو بالمعلم وطردوه لان طلع كلشي ما يفتهم امام فهم وعلم مله فليح ...
المنشور منقول بتصرف والصورة لاعلاقة لها بالمنشور
ليست هناك تعليقات:
إرسال تعليق